Aktuelles

„Plattdüütsch steiht bi uns ganz baven“, so seggt Heinrich Evers, de Plattüüsch-Beopdragte in den Kreis Oostholsteen. Un so harr he wedder inlaadt to en Seminor för Platt in’n Kinnergoorn – op den hööchsten Barg in uns Land, den Bungsbarg. Renate Poggensee un Marianne Ehlers harrn glieks toseggt, na een Johr Paus wedder op den Barg to kamen. För dat Thema: „Lichtertiet op Platt in’n Kinnergoorn – Laternelopen, bunte Blääd in’n Harvst – un denn geiht dat op Advent un Wiehnachten to“ harrn sik 16 Lüüd anmellt. Stütt woorn is de Dag vun de Spoorkass Holsteen – un vun de Plattdüütsch Stiftung Sleswig-Holsteen kregen all, de dorbi weren, en Materialtüüt mit ganz veel Platt för de Kinnergoorn-Arbeit. Al dat veerte Mal hett de Plattdüütsch Stiftung to düt Projekt geern dat Portemonai opmaakt. De Freud vun all weer groot – un de Dag vergüng mit veel Pläseer un gode Ideen för den plattdüütschen Kinnergoorn-Alldag. „Ik fang glieks morgen mit mien Grupp an!“ oder ok: „Nu heff ik soveel an de Hand kregen un bün nich mehr bang – ik krieg dat torecht mit Singen, Spelen un Danzen!“ So keem dat vun de Lüüd – een kann seggen: Dat hett Motivatschoon bröcht!

Marianne Ehlers, Geschäftsföhrerin Plattdüütsch Stiftung